Primary navigation

    Kev Piav Qhia Luv Luv

    Charitable Gambling yog kev tso cai rau cov koom haum pub dawb nyob hauv Minnesota siv kev twv txiaj los mus khwv tau ib qho nyiaj pab. Xyoo tas los, yuav luag muaj 3400 lub koom haum siv kev twv txiaj raws cai no, los mus khwv tau ze ntawm $145 lab nyiaj, los txhawb ntau yam kev pab cuam hauv zej zog. Ntawm no yog cov nqe lus tseem ceeb uas yuav tsum paub txog:

    Puas yog hais tias peb yuav tsum yog ib lub koom haum pub dawb nkaus xwb?
    Yog, cov koom haum pub dawb xwb thiaj li muaj npe koom tau cov kev twv txiaj charitable gambling no.

    Hom kev twv txiaj dab tsi thiaj pub tso cai ua?
    Koj muaj tsib txoj kev twv txhiaj:

    • raffles (kev rho npav yeej nyiaj)
    • bingo (kos cim rau tus lej raug tshaj tawm)
    • pull-tabs (kev rho ntawv yeej nyiaj)
    • tipboards (kev yeej lej)
    • paddlewheels (kev kiv log yeej nyiaj)

    Kev sib twv muag nqi (auction) puas yog kev twv txiaj charitable gambling?
    Tsis yog, kev sib twv muag nqi tsis yog kev twv txiaj.

    Peb ua puas tau lwm yam kev twv txiaj thiab?
    Tsis tau. Yog tias koj twv txiaj los pab khwv ib qho nyiaj pab, nws yuav tsum poob rau tsib yam uas qhia saum toj no xwb. Hom kev twv txiaj xws li "Casino Night" los sis kev sib tw ua phaij poker tsis tau kev tso cai los mus txhawb lub hom phiaj ntawd.

    Kuv lub koom haum pub dawb puas yuav tsum muaj daim ntawv tso cai los sis daim ntawv pov thawj pom zoo rau kev twv txiaj charitable gambling? 
    Feem ntau yuav tsum muaj, tsuas yog tias muaj kev zam rau ob yam uas tshwj xeeb xwb. Nws yuav nyob ntawm seb qhov kev twv txhiaj yuav loj npaum li cas thiab tshwm sim heev npaum cas.

    1. Daim Ntawv Tso Cai
    Yuav tsum muaj daim ntawv tso cai yog tias koj tsim cov kev twv txhiaj loj heev thiab tas mus li.

    • yuav tsum muaj ib tug tswv cuab hauv koj lub koom haum los ua tus thawj tswj kev twv txhiaj, yam muaj daim ntawv tso cai.
    • yog tias koj lub koom haum pub dawb xav mus ua daim ntawv tso cai, peb xav kom koj mus nyeem cov ntaub ntawv hauv qhov website no thiab hu rau tus Licensing Specialist hauv koj cheeb tsam, kom muaj kev sib tham txog cov txheej txheem tseem ceeb yuav tsum tau ua thiab kom nws teb tau koj cov lus nug.
    • nyem ntawm no kom paub ntxiv txog cov cai ntawm Daim Ntawv Tso Cai thiab cov nqi

    2. Daim Ntawv Tso Cai Zam (qee zaum hu ua daim "permit")
    Feem ntau cov koom haum tsis tshuam ua kev twv txiaj charitable gambling loj thiab tas mus li, tsis tas li ntawd lawv khwv qho nyiaj pab koom nrog lwm yam dej num (xws li tuav tej lub koob tsheej lom zem, ua tej rooj mov noj loj thawm xyoo, tsim tej qho chaw xam xab ua si hauv cheeb tsam, thiab lwm yam). Rau cov xwm txheej zoo li no, yuav txoj kev thov daim ntawv tso cai zam yog yam zoo tshaj lawm.

    • Lub koom haum ua tau cov kev twv txiaj pull-tabs (rho ntawv yeej nyiaj), bingo (kos cim rau tus lej raug tshaj tawm), paddlewheel (kiv log yeej nyiaj), raffles (rho npav yeej nyiaj), thiab tipboards (yuav lej)
    • tsuas pub ua koob tsheej twv txiaj tsib zaug tauj ib xyoos
    • qhov nyiaj yeej tag nrho tauj ib xyoos txwv tsis pub tshaj $50,000
    • yuav tsum ua ob daim ntawv (LG220 thiab LG220b) rau txhua lub koob tsheej (ob daim ntawv yooj yim ua tiav)
    • yuav tsum them tus nqi $100 rau txhua lub koob tsheej
    • nyem ntawm no kom paub ntxiv txog Daim Ntawv Tso Cai Zam

    3. Kev Twv Txiaj Me "Excluded Gambling" uas ua tau yooj yim dua
    Yog, lo lus "excluded" kuj yog ib lo uas muaj feem ua rau yus tsis nkag siab meej - cov kev xaiv no yuav muaj kev txwv ntau dua daim ntawv tso cai los sis daim ntawv pov thawj, tiam sis qhov txheej txheem thov yuav yooj yim dua (los sis tsis tas yuav ua li) thiab tsis muaj nqi them ua ntaub ua ntawv.

    • "Excluded Bingo" - tsuas yog ua daim ntawv thov thiab tsis muaj nqi them ua ntaub ua ntawv.
    • "Excluded Raffle" –yog kev rho npav yeej nyiaj me uas tsis tas xa ib yam ntaub ntawv dab tsi rau pab pawg Gambling Control Board, tiam sis cov khoom tus nqi txwv tsis pub tshaj $1,500 los sis $5,000.

    Lus Ceeb Toom Tseem Ceeb
    Nyob rau ib xyoo puag ncig, ib lub koom haum tsuas pub ua ib hom kev twv txiaj raws li qhia hauv qab no:

    • “Excluded gambling” (tsis suav bingo thiab excluded raffle)
    • “Exempt gambling” (raws li daim ntawv tso cai zam)
    • Licensed gambling (lub koom haum yuav tsum yog ib lub koom haum muaj ntawv tso cai)

    Npaj koj txoj kev khwv nyiaj pab kom zoo koj thiaj li tsis raug kev txwv uas yuav cuam tshuam koj cov dej num txog thaum lub xyoo xaus.

    Kuv yuav kawm kom paub ntxiv tau li cas?
    Mus tshawb qhov website ntawm Gambling Control Board kom paub ntxiv txog daim ntawv tso cai, daim ntawv pov thawj thiab ntau yam ntxiv. Puas tseem muaj lus nug ntxiv? Tiv tauj tus licensing los sis compliance specialist nyob hauv koj cheeb tsam, los sis hu rau peb ntawm (651) 539-1900.

    back to top