Kev Hloov Ntawm Tsoom Fwv Teb Chaws Txog Ntoo Xas Hemp

Cov ntaub ntawv nyob hauv qhov website no tsis yog lus qhia txog kev cai lij choj, thiab tsis yog siv los hloov koj lub luag hauj lwm uas yuav tsum ua tib zoo nyeem tag nrho cov cai lij choj thiab cov cai uas siv rau koj. Txhua tus neeg thov daim ntawv tso cai thiab tus tuav daim ntawv tso cai muaj lub luag hauj lwm los ua raws li tag nrho cov cai lij choj thiab cov cai uas siv rau lawv.

Thov nco ntsoov tias tom qab tau kos npe rau tsab cai lij choj tshiab ntawm tsoom fwv teb chaws uas piav qhia hauv qab no lawm, peb tau hloov kho nplooj ntawv no kom qhia txog hnub tshiab uas yuav pib siv qhov kev hloov ntawm qhov kev txhais lub ntsiab lus ntawm tsoom fwv teb chaws. Hnub tshiab ntawd yog hnub tim 11 lub Kaum Ob Hlis xyoo 2026. Lwm cov lus hauv qab no tseem zoo ib yam li cov lus uas tau xa thaum hnub tim 31 lub Yim Hli.

Kev hloov lub ntsiab lus txhais txog ntoo xas hemp ntawm tsoom fwv teb chaws

Thaum lub Kaum Ib Hlis xyoo 2025, President Trump tau kos npe rau tsoom fwv teb chaws tsab cai hais txog kev siv nyiaj uas hloov qhov kev txhais lub ntsiab lus txog ntoo xas hemp raws li Title 7, Section 1639o. Qhov kev hloov rau tsoom fwv teb chaws txoj cai no—uas txhais tau tias yuav txwv cov khoom ntoo xas hemp uas muaj THC ntau tshaj 0.4 milligrams (mg) hauv ib pob—yuav pib siv rau hnub tim 11 lub Kaum Ob Hlis xyoo 2026, tshwj tsis yog tsoom fwv teb chaws ho muaj lwm yam kev nqis tes ua ua ntej ntawd.

Tsoom fwv teb chaws qhov ntsiab lus uas tau txhais tshiab qhia kom meej tias yam twg raug cai raws li industrial hemp hauv txoj cai ntawm tsoom fwv teb chaws. Cov khoom hauv qab no yuav tsis raug suav tias yog ntoo xas hemp raws li qhov ntsiab lus uas tau txhais tshiab, thiab vim li ntawd, yuav dhau los ua yam tsis raug cai raws li txoj cai ntawm tsoom fwv teb chaws:

Tsob ntoo xas hemp thiab tej feem ntawm tsob ntoo ntawd (suav nrog cov noob) uas muaj total THC concentration ntau tshaj 0.3%, suav nrog THCA (qhov ntsiab lus txhais yav dhau los tsuas suav delta-9 THC xwb).
Cov khoom cannabinoid uas muab los ntawm ntoo xas hemp thiab tseem nyob rau theem nruab nrab ntawm kev tsim khoom (intermediate hemp-derived cannabinoid products) uas muaj total THC ntau tshaj 0.3%.
Cov khoom cannabinoid uas tau ua tiav uas muab los ntawm ntoo xas hemp (final hemp-derived cannabinoid products) uas muaj total THC ntau tshaj 0.4 mg hauv ib lub thawv.

Qhov kev hloov ntawm qhov ntsiab lus txhais ntawm tsoom fwv teb chaws no tsis hloov txoj cai hauv Minnesota hais txog cov khoom lower-potency hemp edible (LPHE), cov khw muag LPHE, cov chaw tsim LPHE, thiab cov lag luam muag LPHE uas ua lag luam wholesale, los sis kev raug cai ntawm cov khoom ntawd hauv lub xeev. Lub ntsiab txhais txog LPHE muaj nyob rau hauv Minnesota Statutes, section 342.01, subdivision 50, thiab cov khoom LPHE raug tso cai tsim thiab muag raws li lub xeev txoj cai. Minnesota cov ntsiab lus txhais txog cov ntawv tso cai LPHE thiab hom khoom LPHE yuav tsis hloov tom qab qhov ntsiab lus txhais ntawm tsoom fwv teb chaws tau hloov rau hnub tim 11 lub Kaum Ob Hlis xyoo 2026.

Txawm li ntawd los, raws li tsoom fwv teb chaws qhov ntsiab lus txhais tshiab, ntau yam khoom uas ua raws li txoj cai ntawm Minnesota (piv txwv li, cov khoom uas muaj THC ntau tshaj 0.4 mg) yuav tsis ua raws li txoj cai ntawm tsoom fwv teb chaws lawm. Peb paub tias qhov no yuav muaj ntau yam cuam tshuam rau cov lag luam uas tam sim no muag cov khoom LPHE. Piv txwv li, qhov kev hloov ntawm tsoom fwv teb chaws no yuav ua rau cov lag luam ntsib tej teeb meem zoo ib yam li cov uas kev lag luam cannabis tab tom ntsib tam sim no, xws li:

*Raws li Minnesota txoj kev muab ntawv tso cai, cov lag luam uas muaj cov kev tso cai tshwj xeeb uas siv tau muaj cai coj cov khoom uas tsim nyog suav tias yog LPHE los ntawm lwm thaj chaw los rau hauv Minnesota. Tsis tas li ntawd, lawv kuj muaj cai xa cov khoom ntoo xas hemp uas tsim hauv Minnesota mus rau lwm thaj chaw, yog tias cov khoom ntawd ua raws li cov cai tswj hwm ntawm lub xeev ntawd. Cov nqe lus no hauv txoj cai ntawm lub xeev tau tsim raws li qhov ntsiab lus txhais txog ntoo xas hemp ntawm tsoom fwv teb chaws uas siv tam sim no. Txawm li ntawd los, vim tias ntau yam khoom LPHE uas muaj nyob hauv Minnesota tam sim no yuav tsis ua raws li qhov ntsiab lus txhais tshiab ntawm tsoom fwv teb chaws uas yuav los siv, cov lag luam uas muaj cov kev tso cai tshwj xeeb no yuav tsum ua tib zoo saib seb qhov ntsiab lus txhais tshiab ntawd yuav cuam tshuam li cas rau kev lag luam ntoo xas hemp hla xeev (interstate hemp market). Yog li ntawd, lawv yuav tsum sab laj nrog kws lij choj kom ntsuam xyuas seb qhov kev hloov no yuav cuam tshuam li cas rau lawv lub lag luam. Tsis tas li ntawd, ua ntej cov kev hloov ntawm tsoom fwv teb chaws pib siv, cov lag luam uas twb muaj kev tso cai tshwj xeeb coj cov khoom LPHE los ntawm lwm thaj chaw yuav tsum rov xyuas daim ntawv Guidance Memo 2025-02 (Standards for Out-of-State Hemp Product Importing) thiab xyuas kom meej tias txhua yam khoom uas coj los rau hauv Minnesota yeej ua raws li txoj cai thiab cov cai tswj hwm ntawm Minnesota thiab tsoom fwv teb chaws.

OCM tsis muaj cai muab tswv yim txog kev lag luam lossis kev cai lij choj rau cov lag luam ntoo xas hemp. Yog li ntawd, ua ntej yuav txiav txim siab txog lawv lub lag luam, peb pom zoo kom cov lag luam sab laj nrog kws lij choj. Nplooj ntawv no muaj cov ntaub ntawv los pab cov lag luam npaj rau qhov kev hloov ntawm txoj cai ntawm tsoom fwv teb chaws uas yuav los tom ntej.

Cov kev xaiv txog daim ntawv tso cai rau cov lag luam LPHE

Thaum yuav txog qhov kev hloov ntawm qhov ntsiab lus txhais ntawm tsoom fwv teb chaws — thiab thawj lub sij hawm rov tauj daim ntawv tso cai LPHE — cov lag luam yuav tsum paub txog cov kev xaiv uas lawv muaj. Cov kev xaiv no yuav pab lawv hloov lawv txoj kev npaj ua lag luam thiab daim ntawv tso cai kom haum rau cov kev hloov ntawm tsoom fwv teb chaws uas yuav los tom ntej.

Npaj rau kev rov tauj daim ntawv tso cai txhua xyoo

Raws li txoj cai ntawm Minnesota, cov ntawv tso cai ua lag luam ntoo xas hemp yuav tsum tau rov tauj txhua xyoo. Yog tias cov lag luam tau tshuaj xyuas cov kev hloov ntawm tsoom fwv teb chaws thiab xav ua lawv lub lag luam ntoo xas hemp ntxiv mus hauv Minnesota, lawv yuav tsum npaj rau kev rov tauj daim ntawv tso cai. Cov neeg uas tam sim no muaj daim ntawv tso cai tuaj yeem npaj tau raws li hauv qab no:

Rov xyuas lawv cov ntaub ntawv FPOR kom paub tseeb tias tau kho kom raug
Sau cov ntaub ntawv tiv tauj uas tau hloov tshiab.
Sau lwm cov ntaub ntawv uas siv los txhawb

OCM yuav ceeb toom rau cov lag luam 90 hnub ua ntej lawv daim ntawv tso cai tas sij hawm, qhia rau lawv tias txog sij hawm rov tauj daim ntawv tso cai lawm. Yog tias tseem tsis tau xa daim ntawv thov rov tauj tom qab tau ceeb toom thawj zaug, qhov system yuav cia li xa cov lus ceeb toom rau cov neeg tiv tauj ntawm lub lag luam thaum tshuav 60 hnub, thiab rov xa dua thaum tshuav 30 hnub ua ntej daim ntawv tso cai tas sij hawm.

Tso tseg koj daim ntawv tso cai ntoo xas hemp (suav nrog txoj kev tso tseg daim ntawv tso cai raws li muaj tej yam xwm txheej)

Yog tias ib lub lag luam txiav txim siab tias tsis ua lag luam ntoo xas hemp ntxiv lawm uas muaj ntawv tso cai hauv Minnesota, lub lag luam tuaj yeem tso tseg nws daim ntawv tso cai ntoo xas hemp thiab tso tseg tag nrho nws cov kev khiav lag luam tam sim ntawd. Yog xav yeem tso tseg daim ntawv tso cai, xa email mus rau ocm.licensing@state.mn.us. Muab daim ntawv uas yuav tsum muaj hauv qab no xa nrog qhov email:

Daim Request to Surrender LPHE License Voluntarily uas sau tiav (hloov tshiab hnub tim 29 lub Tsib Hlis xyoo 2026)

Qhov tseem ceeb, daim ntawv no kuj muaj txoj kev xaiv kom tso tseg daim ntawv tso cai raws li muaj tej yam xwm txheej (conditional surrender). Raws li txoj cai lij choj Minnesota Statues, section 342.44, daim ntawv tso cai ua lag luam ntoo xas hemp tsis tuaj yeem hloov mus rau lwm lub lag luam. Thaum tso tseg daim ntawv tso cai lawm, lub lag luam ntawd yuav tsis muaj cai yuav los sis muag cov khoom LPHE ntxiv lawm. Yog tias lub lag luam npaj yuav hloov nws txoj kev khiav lag luam ntoo xas hemp thiab cov khoom mus rau lwm lub koom haum lag luam (business entity), nws tuaj yeem siv txoj kev conditional surrender. Txoj kev no yuav cia lub lag luam tso tseg daim ntawv tso cai uas muaj tam sim no thaum lub koom haum tshiab ua tiav daim ntawv thov thiab tau txais daim ntawv tso cai tshiab, kom txo tau kev cuam tshuam rau txoj kev khiav lag luam. Txoj cai lij choj Minnesota Statutes, section 342.44, subdivision 2, tsis tso cai hloov daim ntawv tso cai ntoo xas hemp mus rau lwm lub lag luam. Vim li ntawd, tus uas muaj daim ntawv tso cai tam sim no yuav tsum tso tseg daim ntawv ntawd, hos lub lag luam tshiab yuav tsum thov kom tau daim ntawv tso cai LPHE.

Cia koj daim ntawv tso cai tas sij hawm

Cov ntawv tso cai ua lag luam siv tau ib xyoos. Yog tias ib lub lag luam xav tawm ntawm kev lag luam ntoo xas hemp, nws tuaj yeem xaiv tsis rov tauj daim ntawv tso cai thiab tos kom daim ntawv ntawd tas sij hawm. Thov nco ntsoov tias thaum daim ntawv tso cai tas sij hawm lawm, lub lag luam yuav tsum tso tseg tag nrho cov kev ua lag luam LPHE.

Nkag mus rau kev lag luam xas rau cov neeg laus

Ib lub lag luam ntoo xas hemp tuaj yeem xav txog kev nkag mus rau kev lag luam xas rau cov neeg laus. Hauv lub caij tsim cai lij choj dhau los, Legislature tau tshem txoj kev txwv uas tsis pub tuav daim ntawv tso cai ua lag luam xas thiab daim ntawv tso cai ua lag luam ntoo xas hemp tib lub sij hawm. Tam sim no tseem tsis tau qhib txais daim ntawv thov rau daim ntawv tso cai ua lag luam xas. Txawm li ntawd los, tseem muaj ntau lub lag luam uas npaj yuav ua lag luam xas thiab tab tom ua cov txheej txheem kom tau daim ntawv tso cai. Tej zaum yuav muaj cib fim los koom tes los sis nqis peev nrog cov lag luam no. Cov neeg uas twb thov los sis muaj daim ntawv tso cai ua lag luam xas tuaj yeem mus saib nplooj ntawv Making Business Changes kom paub txog cov kev xaiv uas lawv muaj thaum yuav hloov tus tswv. Thaum yuav hloov tej yam hauv lub lag luam, yuav tsum koom tes nrog OCM thiab ua raws li cov txheej txheem uas tau teeb tseg. Qee zaum, yuav tsum tau txais kev pom zoo ua ntej [Minnesota Statutes, section 342.14, subd. 1(a)].

Cov tsab cai ntawm tsoom fwv teb chaws uas yuav tau saib xyuas

Thaum lub Kaum Ib Hlis xyoo tas los, tsoom fwv teb chaws tau pom zoo hloov qhov ntsiab lus txhais txog ntoo xas hemp. Txij thaum ntawd los, cov neeg hauv kev lag luam ntoo xas hemp thiab cov tswv cuab ntawm Congress tau sib tham ntau txog seb puas yuav muaj lwm yam kev hloov ntxiv ua ntej yuav muaj txoj cai los siv. Tam sim no, Congress thiab ntau lub koom haum ntawm tsoom fwv teb chaws tab tom xav txog lwm yam kev hloov hais txog ntoo xas hemp thiab xas raws li txoj cai ntawm tsoom fwv teb chaws. Kuj muaj ntau tsab cai tau muab nthuav rau Congress los txiav txim txog thiab. Txawm tias muaj cov tsab cai nthuav los sis tab tom raug txiav txim los, tsis tau txhais tias cov tsab cai ntawd yuav raug pom zoo los ua txoj cai. Kuj tseem nyuaj los paub tias tsoom fwv teb chaws puas yuav muaj lwm yam kev nqis tes ua ntxiv thiab tej ntawd yuav cuam tshuam li cas rau cov neeg uas muaj daim ntawv tso cai hauv lub xeev. Txawm li ntawd los, cov lag luam yuav xav soj qab txog cov tsab cai uas tab tom raug txiav txim no thiab tiv tauj lawv cov neeg sawv cev uas raug xaiv tsa rau tsoom fwv teb chaws txog cov tsab cai no.

Tsab Cai Continuing Appropriations and Extensions Act of 2027 (tsab cai muab nyiaj siv txuas ntxiv ib ntus)

Tsab cai no ncua hnub pib siv cov nqe lus tseem ceeb uas txwv cov khoom ua los ntawm ntoo xas hemp, ntawm hnub tim 12 lub Kaum Ib Hlis mus rau hnub tim 11 lub Kaum Ob Hlis. U.S. Senate tau pom zoo tsab cai no thaum hnub tim 8 lub Yim Hli, thiab U.S. House tau pom zoo thaum hnub tim 1 lub Cuaj Hlis. Tom qab ntawd, tus president tau kos npe rau tsab cai thaum hnub tim 3 lub Cuaj Hlis. Yog li ntawd, qhov kev hloov ntawm qhov ntsiab lus txhais ntawm tsoom fwv teb chaws yuav pib siv rau hnub tim 11 lub Kaum Ob Hlis.

Tsab Cai Lawful Hemp Protection Act

Tsab cai no yuav tsim cov cai ntawm tsoom fwv teb chaws los tswj cov khoom ua los ntawm ntoo xas hemp uas muag rau neeg siv. Ntoo xas hemp uas raug cai yuav tsum tsis pub muaj THC tshaj 1%. Tsab cai kuj yuav teev seb yuav muaj cannabinoids ntau npaum li cas, txwv tsis pub muaj synthetic cannabinoids, thiab tsis pub muag cov khoom no rau cov neeg hnub nyoog yau dua 21 xyoos. Tsis tas li ntawd, cov khoom yuav tsum ua raws li cov cai hais txog kev ntim khoom, daim ntawv lo, thiab kev kuaj. Cov dej haus uas ua los ntawm ntoo xas hemp yuav muaj ib txoj kev faib muag zoo ib yam li dej cawv, thiab cov khoom yuav raug sau se. Tam sim no, U.S. Senate thiab U.S. House tseem tsis tau los pov npav rau tsab cai no.

Tsab Cai Beverage Regulatory Parity Act

Tsab cai no yuav cais cov dej haus uas ua los ntawm ntoo xas hemp tawm ntawm qhov kev hloov ntawm qhov ntsiab lus txhais ntawm tsoom fwv teb chaws. Qhov no txhais tias qhov kev hloov ntawd yuav tsis siv rau cov dej haus uas ua los ntawm ntoo xas hemp. Tsab cai yuav teev seb cov dej haus no pub muaj cannabinoids ntau npaum li cas thiab yuav txwv tsis pub muaj synthetic cannabinoids. Tsis pub muag rau cov neeg hnub nyoog yau dua 21 xyoos. Kuj yuav muaj cov cai hais txog kev ntim, daim ntawv lo, thiab kev kuaj cov khoom. Tsab cai kuj yuav tsim ib txoj kev rau kev faib thiab muag cov dej haus uas muaj ntoo xas hemp uas zoo ib yam li txoj kev faib thiab muag dej cawv. Cov khoom no kuj yuav raug sau se. Tam sim no, U.S. Senate thiab U.S. House tseem tsis tau los pov npav rau tsab cai no.

Lub rooj sib tham uas yuav los tom ntej txog kev lag luam ntoo xas hemp

OCM tab tom npaj ib lub rooj sib tham rau thaum lub Cuaj Hlis yuav tag. Lub rooj sib tham no yuav muab sij hawm rau cov neeg hauv kev lag luam ntoo xas hemp los qhia seb cov kev hloov ntawm tsoom fwv teb chaws cuam tshuam li cas rau lawv cov lag luam. Lawv kuj yuav qhia txog cov kev xaiv uas muaj raws li cov cai tswj hwm tam sim no thiab.

Cov Kev Pab

Yog xav paub ntxiv txog yam khoom twg raug tso cai, cov khoom ntawd pub muaj THC ntau npaum li cas, thiab yuav tsum ntim khoom thiab sau daim ntawv lo li cas, thov mus saib cov ntaub ntawv hauv qab no:

Cov ntaub ntawv pab txhawb rau cov lag luam

Department of Employment and Economic Development:

Cov ntaub ntawv pab rau cov neeg ua hauj lwm hauv kev lag luam xas txog Apprenticeship thiab Dual Training

Department of Labor and Industry:

Legal cannabis industry

Cov ntaub ntawv pab txog kev tiv thaiv kev paug thiab cov cai tswj hwm ib puag ncig

Pollution Control Agency: