Cov Haiv Neeg Khab Uas Tsoom Fwv Teb Chaws Lees Paub

Kev lees paub txhais tau hais tias tsoom fwv teb chaws Asmeskas muaj kev sib raug zoo nrog tsoom fwv khab thiab nws haiv neeg. Nws kuj lees txais pub ib thaj chaw rau haiv neeg ntawd nyob raws cai ua lawv ntiag tug, los mus nyob noj haus raws li lawv tej kab lis kev cai uas ib txwm muaj dhau los. Cov haiv neeg khab uas tsoom fwv teb chaws lees paub muaj xws li, thawj phaum neeg khab uas ib txwm nyob rau teb chaws Asmeskas dhau los, los sis cov phaum tshiab uas ncau los ua ntej mab dawb tswj hwm teb chaws.

Cov haiv neeg khab uas tsoom fwv teb chaws lees paub, muaj cai tau txais qee yam txiaj ntsig, kev pab cuam, thiab kev tiv thaiv los ntawm tsoom fwv teb chaws vim lawv nyob rau lub sam xeeb tshwj xeeb.

Cov haiv neeg khab muaj cai tsim lawv ib tsab cai tsoom fwv los ntawm lawv ntiag tug. Muaj ntau pab pawg khab uas muaj lawv ib txhooj cai. Qee pab pawg khiav lawv ib tsab cai raws li qhov Articles of Association los sis lwm yam cai lij choj. Qee pab pawg tseem siv lawv txoj kev tswj hwm qub uas ib txwm muaj los lawm ntev. Tus thawj coj loj ntawm pab pawg khab, feem ntau, muaj lub npe hu ua tribal chairperson, tiam sis kuj hu tau nws hu ua tus principal chief, governor, los sis president. Tus thawj coj no saib xyuas cov dej num ntawm pab tribal council. Xws li, nws yog pab pawg neeg uas tsim cai lij choj. Qee pab pawg kuj muaj kev pov npav seb puas muaj kev pom zoo rau cov cai tshiab uas tsim los ntawm pab tribal council.

Cov ntaub ntawv no los ntawm: Lub Department of the Interior, Office of American Indian Trust